Bhaiya Meri Kya Galti – Bhai Ke Saath Behan ke Masum Pyar Ki Khani

Doorbell baji toh rakhi bhaag kar darwaje par pahunchi. Vaha postman tha, koi registry laaya tha. Rakhi ke dil ki dhadkanein tej ho gyi. Kaapte hatho se registry kholi, toh kisi exam ka form nikala. Aaj bhi use mayusi hath lagi. Dil k kisi kone mein use ek aasha si thi ki shayad iss baar khat ka jawab aa jaaye.

Raksha bandhan aane ko tha aur usne hamesha ki tarah raakhi ka rolli laccha bhaiya ko ek pyar bhare khat ke sath post kar diya tha. Use intezaar tha, kisi jawab khat ya moneyorder ka, lekin pichle 10 saalo se na toh bhaiya ka koi moneyorder aaya tha, na hi khat. Telephone par jab bhi woh baat karna chahti, toh koi uski aawaj sunkar phone hi kaat deta tha. Postman ke aane se bandhi umeed ki asafalta thi ya saalo ki ikaatha huyi bhavnayein, rakhi ki aankein bhar aayi.

Bhai Behan Ke Pyar Ki Khani

Bhai Behan Ke Pyar Ki Khani

Pati ki aawaj ne use chounkaya, toh aansu ponchkar rakhi rohan ko office ke liye “see-off” karne gayi. Fir almirah se shaadi ka album nikaal kar panne paltane lagi. Uska saara dhyan unhi tasveeron par tha, jahan-jahan bhaiya the. Kitna pyara chehra tha bhaiya ka! Shaant aur hansmukh bhaiya rakhi se teen saal hi bade the. Ateet ke sabhi panne rakhi ki saamne Ghumne lage. Teen peediyo tak pariwaar mein koi Ladki na hone se rakhi bachpan se hi sabki laadli thi. Bhaiya toh uss par jaan dete the. Bhaiya jitney shaant the, rakhi utni hi natkhat. Kitabein gayab kar dena, jute chupa dena, shaving cream ki jagah toothpaste rakh dena rakhi ka roj ka kaam tha. Bhaiya uski sabhi shararton ko sehte, uski har zidd maana karte. Umar mein khaas farak nahin hone par bhi use bachon ki tarah rakhte. maa batati thi ki Bhaiya tere paida hone se itne kush the ki unhone tera  naam hi “rakhi” rakh diya. Bhaiya har takleef mein rakhi ka sath dete. Kabhi uski tabiyat Khrab ho jati toh pura din uske pass baitha karte the….!

Raksha bandhan ka din toh “rakhi” ka hi hota hai. Subah se hi farmayishein shuru ho jaati. Yeh laayo – vo laayo, tab hi rakhi bandhugi. Bhaiya rakhi bandhwaane aage-peeche ghumte. Maa, baapu ji gussa karte ki bhai ne behen ko sir pe chadha rakha hai, par uske naaj- nakhre uthane mein bhaiya ne kabhi koi kasar nahin rakhi. College tak aate-aate bhaiya uske ache dost ban gaye the. College mein kisi ki himmat hi nai thi ki koi ladka aankh uthakar rakhi ko Dekhe. Fir bhi na jaane kab rohan rakhi ko acha lagne laga. Bhiya ko bhi veh yun toh pasand tha, par bhaiya chahte the ki voh pehle apne pairon par khada ho jaaye. Rakhi ki jid ke chalte ghar mein maa-babu ji ko bhaiya ne shaadi ke liye manaya, uske baad rohan ki naukri lagne se pehle hi dono ki shaadi ho gayi. Jeewan apni raftaar pakdane laga.

Rakhi apne shaadi-shuda jeewan mein busy ho gayi aur bhaiya ne babu ji ka business sambhal liya. Rakhi ke parivaar mein chaar log the suraj aur nanhi palak. Jab-jab rakhi apne mayke aati toh vo apne bhaiya ki shaadi ki baat uthati rehti. Rohan ka kaam bhi ab dheere-dheere set hone laga tha ki ek hadsa ho gaya. Babu ji nahin rahe. Babu ji ke gujar jane par lawyer ne vsiyat padkar sunayi. Uttaradhikar niyam ke mutabik dono bhai-behen mein sampati ka barabar bantwaara babu ji ne kiya tha. Rakhi se jab sampati mein hissa lene ki baat ki gayi, toh usne haan kar di. Iss desh mein aksar ladkiya sampati lene se mana kar deti h, vahan rakhi ke iss faisle ne sabhi ko chounkaya toh bahut, par kisi ne kuch kaha nahin. Maa bhaiya ke sath hi rahi. Unke prem mein koi kami nahin aayi, par bhiya achanak badal se gaye.

Rohan ke business ko madad ki jarurat thi. Shaadi ke chalte rohan ke parivaar ki taraf se koi aasha nahin thi aur babu ji ka business toh settled tha, yahi sochkar rakhi ne hissa le liya tha. Par bhaiya uska ulta matlab lagayenge, usne aisa socha na tha. Dheere-dheere bhaiya ka aana-jaan, baatein karma sab kam ho gaya. Fir ek din maa ne khabar di ki bhaiya ne court marriage kar li. Rakhi toh hairan reh gayi. Rakhi Bhaiya se khub ladi ki aisi kya jaldi thi…. Shaadi dhoomdham se karte. Par bhaiya ki chuppi use beganepan ka ehsaas kara gayi. Kai baar rakhi ne bhaiya ko unke badle vyavahar ke liye toka bhi, lekin udhar se hamesha koi  jawab na aata. Rakhi bhi dheere-dheere bhaiya se katne lagi. Babu ji the tab chahe bhaiya kitni bhi dur kyo na ho, raksha bandhan par jarur aate, par ab veh silsila khatam ho gya tha.

Rakhi aksar akele mein roti. Dil ke zakham dikhati bhi toh kise?? Kese batati ki uska apna haq lena hi use bhai se dur kar gaya. Usne aakhir kya galat ki thi?? Rakhi yeh sawaal puchti bhi toh kisse?? Na maa kuch batati thi, na bhaiya kuch bolte the. Bhabi achi thi, par bhaiya se sambandhit (related) vishyo (topic) par chup hi rehti. Dheere-dheere bhai behen mein duri itni ho gayi ki aana jaan, milna-julna toh dur, khat ka jawab dena tak band ho gaya. Vo bhaiya jo rakhi bandhwaane ke liye rakhi ke age-piche ghumte the, uski har farmayish puri karte, ab rakhi par behen ko phone tak nahin karte. Rakhi ke aankho se aansu behne lage. Album ke panne geele ho gaye the. Aankhon ki nami se tasveerein dikhni band ho gayi. Rakhi ne album saaf kiya aur khana banane mein lag gayi.

Bachon ke school se aane ka waqt ho gaya tha. Do din baad raksha bandhan tha. Par unhe abhi se hi rakhiya khareedne ki padi thi. Shaam ko unhe bazaar le jaate waqt rakhi bahut udaas thi. Badi khubsurat rakhiya thi. Bachon ne manpasand rakhiya khareedi. Bitiya ne farnmayish ki mummy aap bhi rakhi khareed lo. Usne samjhaya ki mama dur rehte hain aur veh unhe rakhi bhej chuki hai, par bache nahin mane. Be-mann se ek rakhi veh bhi le aayi. Raksha bandhan ke din sabhi ne naha-dhokar pooja ki, fir thaali saja kar nanhi palak ne Suraj ko rakhi bandhi. Bacho ko rakhi bandhte dekh uska mann bhar aaya, par hanste-khelte mahool mein usne apne aansu ponch liye. Rohan ko pakode pasand the, so rakhi pakode talne lagi. Usi waqt door bell baji. Thoda hungama sun rakhi kitchen se bahar aayi. Darwaaje par maa aur bhiya-bhabi the. Ek pal ke liye toh rakhi ko yakeen hi nahin hua, itne saalo baad bhaiya ko jo dekh rahi thi. Kitne kamjor ho gaye the. Bhaiya ne baahein failayi, toh rakhi ke aankho se aansu nikal pade. Veh bhaag kar unke gale lag gayi. Dono ro rahe the, barso ka guma hua pyar beh raha tha.

Bhaiya ne kalayi aage ki, rakhi thaali utha laayi. Rakhi, tilak, nariyal aur mithayi thaali mein rakhi thi. Hamesha ki tarah rakhi ne tilak lagaya toh bhaiya rone lage. “mujhe maaf kar do behen, mein bahut matlabi ho gaya tha. Asal mein babu ji par kaafi karz tha, jab wo guzre toh aarthik pareshaniyan thi. Tere dwara apna hissa lene se mujhe laga ki kalyug mein shayad paisa hi sab kuch ho gaya hai, ‘swarth’ ke alawa iss duniya mein or koi rishta hota hi nahin. Par teri bhabi ne mujhe aarthik pareshani mein dekh jab apne mayke mein yahi kadam uthaya, tab mujhe ehsaas hua ki aurat shaadi ke baad apne pati se kis kadar jud jaati hai. Tumne jo kiya, voh sahi tha. Maa-baap par dono ka samaan haq hai, chahe voh beta ho ya beti. Tumne toh hamesha rakhi bheji, par mein hi pyaar ka yeh bandhan nibha nahi paaya.

Bhiya rote chale ja rahe the. Maa, Bhabi, Rohan, Bachche, sab khade dekh rahe the. Rakhi ne thaali me se rakhi uthayi aur thode gusse me kaha- “Meri farmayish puri karoge, tab hi rakhi bandhungi….!” Bhaiya rote-rote muskura uthe or bole- “haan Karunga” Rakhsha bandhan ke is Pavitra bandhan ne dilo ko aakhir mila hi diya tha.

81 Comments

Add a Comment